VREMEPLOV: Društveni život nekad

Va Kostrene, ma i va seh primorskeh mesti, najviše bi se po nedelje našli muški va oštarije i neki bi igrali na balote. Bilo bi i šijanja, brisali bi se punti sinjani z belun kredun na stolu, zijalo bi se na vas glas, neki bi se jadili, a ni moglo to pasat bez  neke kljetve, a igralo se samo za ono ča je bilo na stolu – vino ko bi platili oni ki zgube.

Ni bilo gostionice, krčme ni oštarije va keh se ranejeh let ne bi neki muški našli skoro saku večer, a po nedelje i na blagdan već i zapolne. Uz špricer, žmulj vina, gemišt il bevandu povedalo bi se o onomu ča bi se pasaneh dan dogajalo i o sakakoveh novosti va mestu, posebno o ten kako je pasal domaći nogometni klub, ma ni moglo pasat ni bez politike, a pomorci bi se raspovedali o svojen zadnjen vijaju. Ni moglo pasat bez karat i to na nekuliko stoli – briškula, trišeta i marijaš, ma nikad za soldi, leh da ono ča je popijeno plate oni ki su izgubi. Taj dobiveni žmulj vina bil bi slaji od najslajega cukara, a onaj ki je zgubil  se mogal samo jadit. Duralo bi to do kasneh ur al doklje bi ih oštar seh potiral. Nekad bi neki malo jače zijali, morda bi se i pokarali, a se ki put bi se neki i malo potukli, zna se ča se dogaja kad se malo više popije alkohola. Ma već bi se jutra se pozabilo.

Tombola

Ženske, one malo stareje i one stare, bi se po nedelje zapolne na neken putu igrale na tombulu (muškeh tu nikad ni bilo, kako ni ženskeh va oštarije). Igrale bi za neki mići soldi po saken đogu. Jedna, ona neš malo mlaja, na vas glas bi z jedne vrećice zdigala broji (od jedan do devedeset) i se ki put bi ih morala ponavljat onemin ke malo slabeje čuju. Nikomu se ni prešilo. Jadile bi se one ke nisu dobivale, a one ke su taj dan imele sriću bi veselo, s oneh malo dobiveneh soldi, šle doma. Se bi to duralo do prvoga sumraka.

Ljubavni razglas

Na Vazmeni pundeljak bi bilo veselo. Na jednu jaku granu nekoga stabla obesilo bi se ljuljalku. Neki mlaji muški za sun bi forcun rival ljuljaljku, a koj bi sedela neka mlaja ženska ka je imela jaki glas i z sega bi glasa kantala besede ke su bile namenjene nekoj divojke il mladiću za keh se znalo da se kortejaju onako po skriveć. Sada neka to si va selu doznaju! O tanceh bi se mogla i knjiga napisat. Jedva se čekalo da pasa korizma i da na Vazmeni pundeljak budu prvi tanci pokle maškar. To bi vavek bila vela fešta i kako bi se reklo „pravi društveni događaj“. Puno bi se o ten pokle jako povedalo, a neki put bi se, onako po skriveć, šapićalo kad bi se videlo da je nekoj mladoj ženske pokle maškar nekako počel rast trbušić!

A danas?

Ma, sad toga više ni. Sad su kafići, a saka familja ima televiziju pa se ljudi zabavljaju sami sobun, zaprti va kuće i zagljedani va ekran. Nimaju potrebu nikamo poć, aš se imaju doma. Zgubila se volja za ona „društvena događanja“. Plaćamo taj „svekoliki napredak“. Imamo se bolje tehnološke izume, ma smo zgubili onaj lipi nekadašnji običaj nać se va kumpanije.

Ma ne perikulajmo. Nekada, kad smo bili mladi njurgali smo na one stare ča nan urdini davaju, a sada kad smo ostareli njurgamo na ove mlade ča ne delaju kako bimo mi oteli. Tako van je, ljudi moji, od pamtivjeka bilo, tako će zavavek bit, da se mladi ne razumeju staremin, a ni stari z mlademin. Nemojmo plakat za onen ča je bilo, svit mora poć naprvo.